Asturias Izquierda Unida Titulo: Llamazares considera que na nueva PAC hai aspeutos que pueden favorecer a la rexón. Texto: Llamazares realizó estes declaraciones demientres una visita a la Cooperativa de Llabradores de Xixón, en compañía del diputáu Aurelio Martín y otros dirixentes d'IX. Llamazares refugó una confrontación total cola nueva Política Agraria Común (PAC), y apostó por caltener pero esquizar les posibilidaes qu'ufierta pa l'agricultura de monte, ecolóxica y de la esplotación familiar agraria como ye la d'Asturies, y por establecer aliances ente comunidaes autónomes similares pa defender eses posibilidaes. Llamazares recordó qu'esisten aspeutos refugables, pero hai otros d'interés p'Asturies por casu, el qu'el 50 per cientu de les ayudes puedan establecese a nivel estatal. Esto dexaría una política agraria estatal que favoreza les zones de monte o a les d'agricultura familiar, como ye'l casu asturianu. Coles mesmes, destacó que'l futuru del sector agrariu y agroalimentariu asturianu pasa pola collaboración ente les cooperatives, el sector financieru y l'Alministración nacional y rexonal. Nesti sentíu, sorrayó'l modelu siguíu pola Cooperativa Agraria de Xixón que nun se quedó namái colos sectores tradicioneals, magar que son importantes tamién, sinón que contribuyó como poques a diversificar el sector agrariu y a qu'haya rentes complementaries nel sector agricola, como la güerta, la diversificación en materia de pumares, na faba, nos arándanos... . Hai munches posibilidaes pal sector y esta cooperativa ye bona amuesa d'ella, esplicó Llamazares dempués d'escuchar les esmoliciones d'un numberosu grupu de cooperativistes y espone-yos la so visión de la reforma de la Política Agraria Común.
